सम्पादकीय

“श्रेयसि बहुविघ्नानि भवन्ति महतामपि” अर्थात् श्रेयस्कर कार्यमा महान्-महान् व्यक्तिहरुलाई पनि धेरै बिघ्नबादाहरू हुन्छन् रे यसैले हामीहरू जस्ता सामान्य जीवहरूका कार्यमा केही सामान्य समस्याहरू आउनु त स्वभाविक नै हो । मधुमास नामको यो सानो साहित्यिक वाटिकाको प्रयासमा पनि यस्तै केही समस्याहरू नआएका भने होइनन् तर ती समस्याहरूलाई झेल्दै कहिले रेलका डब्बाहरूबाट, कहिले प्लेटफार्मबाट कहिले नदी किनाराबाट मधुमास पस्कने प्रयासहरू केही दिनदेखि शुरूभएको छ । भनिन्छ-

ढुङ्गाको काप फोरेर पनि उम्रन्छ पिपल 

सिर्जना शक्ति संसारमा कहिल्यै हुदैन विफल 

यसैले छोटो अवधिमै पनि मधुमासले धेरै नेपाली मन र मुटु लिएर संसारका विभिन्न देशहरूमा छरिएर रहेका तथा स्वदेशमा रहेका नेपालीहरूको प्रेम पाएको छ । मधुमास एक नवजात शिशु जस्तै नै छ यस वाटिकामा अझै धेरै गमलाहरू खाली-खाली रहेकाछन् यहाँहरूका रचनारूपी फूलहरूको खाँचो छ मधुमासलाई । साथै बालक मधुमासले चपलता देखाएर केही गल्तीहरू पनि गरिरहेको होला बालकहरू त चपलता देखाउँछन् नै तर बालकको चपलतामा यहाँरूले कुनै रिश-राग राख्नुहुने छैन भन्ने मधुमासले ठानेको छ तथा बालकका गल्तीहरू सुधार्न यहाँहरूले सहयोग गर्नु नै हुनेछ भन्ने पूर्ण विश्वास पनि छ । कोही देशका त कोही परदेशका समस्याहरूलाई झेल्दै गरेका तथा साहित्य पिपासु नेपालीहरूलाई साहित्यरूपी फूलहरूले सजिएको पूर्णमधुमास दिनु तथा नवोदित नेपाली साहित्यिकारहरूलाई हौसला प्रदान गर्नु नै मधुमासको एक विशुद्ध लक्ष्य हो । मधुमास तपाईंको हो अनि मधुमासको तपाईंहरू नै । यसैले मधुमासमा रहेका रचनाहरू पढिसकेपछि तपाईंहरूलाई कस्तो लाग्यो प्रतिकृयाहरू दिनुहोला । प्रतिकृया दिदा रचनात्मक तथा स्रष्टाहरूलाई सहयोग पुग्ने खालका सुझाव शिष्ट शब्दहरूमा दिने प्रयास गर्नुहोला । शिष्ट र मधुर शब्दहरू प्रयोग गरेर लेख रचनाहरू तयार गर्नुभएमा मधुमासमा अझ मधुरता आउने छ भन्ने हाम्रो विश्वास छ । 

अनाम अज्ञातबासी